أحببت مدمن
- وافقتي ليه؟
- تاكل عنب؟
-وافقتي لييه؟
- بس مسكر و حلو أبقى هات تاني
خبط الطربيزه برجله - ردي
بصيتله - عايز ايه؟
- عايز أعرف مارفضتنيش ليه ؟
- مش أنت أتقدمتلي ؟
-اه
- طيب و أنا وافقت و أتجوزنا الحمدلله
- بس أنا مدمن
- تؤتؤ أنت بطلت و بتتعالج
- لسه ماتعالجتش و ممكن أموتك و أنا مش حاسس إفهمي أنا خايف عليكي
- منك؟
-.....
- أنا عارفه إنك مش هتأذيني صح؟
-مش بإيدي
- طيب و أنا معاك للأخر، أديته الطبق و قومت....كُل عنب طعمه حلو
أنا عارفه إنه صعب و مشوار طويل بس إني أسيبه أصعب هو دايمًا كان معايا في أي وقت صعب ف مايستاهلش إني أتخلى عنه
- يلا علشان تاكل
-مش عايز
قعدت قدامه و ربعت - خلاص و أنا كمان مش عايزه
بصلي بتردد - بس.. بس انتي ماكلتيش من إمبارح
- لا عادي مادام أنت مش عايز ف أنا كمان مش عايزه
- و علاج الأنيميا؟
-و علاجك؟
نفخ وشدني - قومي خلينا نطفح
- في ولد محترم يقول نطفح؟
-عارفه لولا العشره و القرابه اللي بينا كان زماني عامل منك ايه؟
-ايه؟
- شاورما
-فراخ؟
- و الصوص يبقى كتير كده؟
-مع عيش سوري
-و بيبسي كنز
-يلاهويي أكاد من فرط الجمال أذوب والله
- أنا هجيب سندوتشين أجبلك كام؟
الحياه بسيطه أوي يعني شوفتوا غيرنا الموضوع إزاي بعد ما كنا هنتخانق جيبنا أكل و قعدنا ناكل، تحس فينا تفاهه من بعض علشان كده طول الوقت اللي كنا قريبين من بعض فيه مافتكرش أنه أتخاصمنا، عملت شعري قطتين ولبست البيجامه بتاعته هي أه قدي ٣ ٤ مرات و أطول مني بكتير بس برضو هلبسها
-ايه دا؟
رجعت خطوه - ايه؟
- لابسه حاجتي ليه؟
-ليه؟
-هنستهبل؟
-لا
وقف- إثبتي مكانك
طلعت أجري - والله أبدًا
فضل يجري ورايا لحد ما فرهدت
قعدت على الأرض - لا خلاص مش قادره إلحقني بمايه بسكر بسرعه
بصلي بقلق-بجد ولا بتهزري؟
- والله بجد أنت عارف بتعب بسرعه
جري على المطبخ - لحظه و هاجي
أنا فعلًا تعبت 5 دقايق جري حسيت إني جريت سنه و هذا عيب من عيوب الأنيميا يا عزيزي
- أحسن؟
-اه استريحت الحمدلله
-خلاص ماتتحركيش تاني بقى
وقفت و أنا بضحك - ايه دا أنت تعبت يا عجوز
رفع حاجبه-أنا عجوز؟
-اه و عندك شعر أبيض أهو حتى شوف، شديته من شعره و جريت
-ااه يا بنت ال..
-ولد! عييب
-تصدقي أنا غلطان إنك صعبتي عليا، إجري ياختي هتروحي فين يعني الشقه كلها أوضه و صاله
- لاء ماسمحلكش دي أوضتين وصاله و حمام و مطبخ و بلكونه كبيييره
-ياترى أنا عاملها كبيره ليه؟
-ليه؟
- مين اللي فضل 5 سنين يقرفني أنه عايز بلكونه تكون كبيره يقعد يكتب فيها و هو بيشرب شاي؟
- أنا
- بالله يا شيخه بتقعدي فيها؟
- منا بكسل ألبس النقاب، كشرت.. وبعدين مش قولتلك تركب ستاره أو حاجه في البلكونه؟ ماهو أصلًا الإهتمام مابيتطلبش و أنت لو مهتم كنت هتفتكر و أصلًا أصلًا.....
قاطعني - لحظه أنتي بقلبي الطربيزه عليا؟
ضحكت - ايه دا خدت بالك؟
مش كل الأوقات بتبقى حلوه و دا طبيعي مش لازم نبقى عايشين حياه سعيده طول الوقت مش لازم نكون خاليين من العيوب علشان نكمل ممكن عادي تبقى مليان عيوب بس تلاقي حد بيحب عيوبك مافيش حاجه إسمها سعاده أبديه بس في حاجه إسمها أتنين بيسندوا بعض لما واحد يقع يلاقي التاني يقومه.
سمعت صوت تكسير و زعيق من الأوضه بتاعته و للأسف أنا عارفه من إيه و عارفه أن الوقت الجاي مش هيبقى ألطف حاجه أبدًا، أتسحبت بشويش لحد باب الشقه وقفلته بالمفتاح و خبيته، فتحت باب أوضته بشويش الأوضه نصها إتكسر و الهدوم على الأرض و شكله... مش شبهه
-آ أنت كويس؟
بصلي و عيونه كانت حمرا و عروقه كلها باينه - كان فيه حاجه في دولابي هنا مش لاقيها
- بودره كده لونها أبيض؟
-ااه
- تقريبًا كده والله أعلم رميتها
زعق - أنتي غبيه إزاي تعملي كده!
رفع إيده علشان يضربني غمضت عيني أوي و جسمي كان بيترعش كنت مستنيه القلم اللي هاخده و أنا بحاول أكتم العياط، جسمي إتنفض أول ما حسيت بإيده بتعدي جنب راسي و بتضرب الحيطه
-إطلعي براا
- طيب ممكن...
قاطعني- خلاص خليكي هطلع أنا، راح ناحية الباب... انتي قافله الزفت ليه؟
- علشان ماتنزلش
-إفتحيه
-لا
زقني جامد ف وقعت على دراعي جامد بس هو مش قصده والله مش كده؟
اليوم عدى بشكل غريب كلمت الدكتور و جيه أداله مهدئ و قالي أنها أعراض الإنسحاب الطبيعيه مشي و محمد نام فضلت قاعده جنبه مستنيه يقوم ماكنتش حاسه بدراعي كان كل تفكيري فيه هو و كمية الوجع اللي حاسس بيها.. عمري ماشوفته كده متعوده عليه قوي طول الوقت كان هو اللي بيقف جنبي ويطلعني من المشاكل مش العكس، إفتكرت لما حكالي عن أصحابه الجداد حذرته منهم كتير ماكنتش مستريحه قلبي كان مقبوض قولتله أن الصاحب ساحب و مصدقنيش بعدت عنه قولت يمكن يحس أنه غلط بس بعدي خلاه يقرب منهم أكتر وبقى زيهم للأسف مدمن! فاكره نظرة عمي وهو بيقولي وافقي عليه أنتي الوحيده اللي هتقدر ترجعه مكانش ينفع أرفض قلبي كان هيوجعني كل ما أشوفه ماقدرتش أبطل أحبه
-انتي كويسه؟
قعدت عدل - أنت فايق؟ قصدي يعني بقيت كويس ولا لسه تعبان؟ أو...
قاطعني - أنا تمام الحمدلله
-هجبلك الفطار
- هو..هو أنا عملتلك حاجه؟ يعني إمبارح؟
-أنت مش فاكر؟
- لا مش عارف أفتكر
أبتسمت - ماتقلقش
مشيت و أنا مش عارفه هعمل إيه بعد كده
مسك إيدي و شاف الزرقان اللي فيها - دا أنا مش كده؟
- لا دا أنا إتخبطت في ال...
-ماتكذبيش علشان مابتعرفيش، أنا.. أنا بجد أسف
-ماحصلش حاجه والله مابتوجعنيش أصلًا
-تمام لما أتعب تاني إنتي تفضلي في أوضتك و ماتطلعيش تمام؟
- تمام
-لا إحلفي
-والله
-قوليها على بعضها
- والله مش هطلع من الأوضه لما تتعب
الموضوع مكانش سهل.... مكانش سهل أبدًا بس كل مره بتبقى أقل من اللي قبلها كل فتره بيعمل تحليل يشوف نسبة القرف دا قد إيه في دمه و كل مره بيقل بشكل كبير و كل مره بنحتفل بالإنجاز دا
- رايح فين؟
- خارج
- أيوه مع مين؟
- هقعد على القهوه
- طب و أنا؟
- خلاص ألبسي و تعالي نخرج
- لا خلاص مش عايزه أخرج أنا هقعد أسمع فيلم
- ماشي
- مش هتتحايل عليا؟ أصلًا الإهتمام مابيتطلبش، فتح الباب.. خلاص يا ولا بهزر والله
دا مشي بجد! ايه دا هو مش هيقولي خلاص مش نازل و هقعد معاكي؟ كلكوا مصطفى أبو حجر فعلًا، بعد ١٠ دقايق سمعت الباب بيتفتح
-أنت لحقت روحت القهوه!
رفع إيده يوريني الكيس اللي معاه - كنت بجيب حاجات للسهره، جهزتي الفيلم؟
عارفين؟ لو رجعت بالزمن و جاتلي فرصه الإختيار تاني كنت هختاره برضو هو مايتسابش يجماعه بجد، مش معنى إن الشخص عمل شيء غلط في حياته أنه يبعد عن الحياه كلها بسبب الشيء دا كلنا بنغلط و مافيش بشر ملايكه المهم نعرف الغلط و نصححه و نبعد عنه
صحيت مخضوضه على فتحة الباب - إيه البيت بيولع
-لا
- بيغرق؟ بيتهد؟
-لا برضو
- أنت مبتسم كده ليه؟
-قومي طيب بسرعه
شدني وراه و أنا زي الحماره مش فاهمه حاجه - في ايه طيب؟
- عندي خبرين..
قاطعته - ماتقولش! واحد وحش و واحد حلو و هتقولي أختار أسمع ايه الأول؟
- ايه جو الأفلام دا؟ الأتنين حلوين عادي
-اووف طيب قول
أداني نتيجة تحاليل، فتحتها و فضلت متنحه فضلت أبصله و أبص للتحاليل كذا مره - دا بجد؟
- بجد بجد
- يعني خلاص كده؟ خفيت؟ يلاهوي مش مصدقه بالله! الحمدلله الحمدلله
فصلت أتنطط و أضحك من الفرحه
شدني للبلكونه- تعالي بقى للتانيه
- طيب إستنى ألبس النقاب
- مش هتحتاجيه
دخلت و أنا مش مصدقه، عملها بحاجه زي إزاز تقدري تشوفي اللي برا بس اللي برا مايشوفكيش، حضنته بتلقائيه - أنت أحسن حد في الدنيا أقسم بالله
ضحك و أنا بعدت عنه وفضلت ألف في البلكونه دي هتبقى أحلى قعده
- أنتي فاكره قولتيلي ايه لما كنا بنتكلم عن البلكونه و الستاره وكده
-لما قولتلك أن الإهتمام مابيتطلبش و أنك لو مهتم كنت عملتها؟
- اه
- لا مش فاكره
- طيب مش أنا عملتها؟
-اه
- أبقى إيه؟
- إيه؟
- أبقى مهتم
- أه أنت صح
-و اللي مهتم بحد يبقى إيه؟
- إيه؟
أتنهد - بيحبه يا ياسمين بيحبه
ضحكت - وهو كمان بيحبه.
تعليقات
إرسال تعليق