حِـوار صحفي مع الكاتبة الليبيـة أينور بوراس

قصيدة لسه هقوى

إسراء الزهدي 

الحب عمر ما كان سبب للضعف أو الهزيمة مينفعش ندفن نفسنا عشان الحب أو نلغي شخصيتنا ونوقف حياتنا على حب شخص حبه لينا كان مجرد حرب للوصول للإمتلاك، حبيبك اللي ميدعمكش ويكون سبب يقويك على الحياة ميبقاش حبيب، وحبيبك اللي يجبرك إنك تضيع أحلامك ومستقبلك عشانه بمزاجه وهو قاعد يتفرج عليك وأنت بتدمر ميبقاش حبيب، لإن اللي بيحب بيدعمك، بيكون سندك طول الطريق لحد ما توصل وتحقق كل أحلامك، ولو في يوم إتنازلت عن حلم عشانه يبقى بمزاجك أنتَ لأنك شايف إنه يستحق تسيب حاجة واحدة كان نفسك فيها، عشان شخص ساب العالم كله عشانك، فمينفعش نضعف بالحب، بل إن لازم نبقى اقوى، وشروخ قلبك متستناش حد يداويهالك، داوي نفسك بالنجاح والآمل، مفيش مكان لليأس في حياتك، ولا في وقت تقف تتفرج على حبيب في وسط الطريق سابك، لازم تقوى، وبكرة هتبقى أقوى. 

وعشان كدا جيالكم بقصيدة «لسةهقوى». 

 وفي كل مرة بقرر أبعد

وبقولك فيها إبعد

 بيبقى...

 ‏نفسي تبقى

 وتحارب عنادي

 بعند اكبر.. 

 ‏بعند اقوى.. 

 بيبقى نفسي تقولي اني هقدر.. 

ابقى اقوى.. 

ببقى نفسى بس ف لحظة اشوف...

الفخر ف عيونك تجاهي

نفسي متشوفنيش ضعيفة

نفسي تكون مرايا ليا

واشوف فيك ايامي اللي جيا

اشوف فيك احلام بتتحقق

واشوف مستقبل ليا بعيونك

مكنتش اتمنى اخونك

او اخون عهد في يوم كان ما بنا

او اخون كلمة هصونك

دا اتهام منك إليّا

... 

ياللي كنت حبيب وضحكت الناس عليا

بعترف اني خنتك

اول خيانه اني قدرت اشوف الدنيا من بعدك

وحبيت شخص كان فعلا يستحق الحب

 بس انا اللي قلبي بيك كان اعمى

الشخص دا ذاتي ومستقبلي وحياتي

ما اصل كان لازم احب نفسي 

ومفضلش عامية وسكينة الحب سحباني

خنتك تانى... 

لما بنيت لنفسي كيان

وشوفت نفسي في مرايا تاني 

لسه شيفاني.. 

اقدر اعمل اكتر

مدام فيا الروح وبتنفس

مرايا ورتني الحلو اللي فيا من غير مقابل

واوعى تقول اني مصنتكش

دا انا رغم خدوشك ليا

وبرغم انك دفنت روحي حيا

لسه بحنلك... 

ولسه قلبي مستني يشوف فعنيك

نظرة امل ليا

ولسه مستنيه احس انك

ولو بينك وبين نفسك فخور بيا

وانتظاري لإمانك بيا مش ضعف

انا بس كان عهدي مع ذاتي ونفسي

اني اثبت للي ذيك

ان بنت زيي

مدفنهاش حبك وحقدك 

مدفنهاش امتلاكك وغرورك 

مدفنهاش وهم منك 

ومدفنتش لاجل قربك

دي قدرت تبقى اقوى بفضل كلمة منك 

في يوم حسستها انها ولا حاجه فنظرك

وانك شيفها مجرد بنت لا حول ليها ولا قوى

... 

كنت ببقى نفسى بس تسمع

 صوت انيني

 او حتى تسمع صوت بكايا

 وصوت حنيني 

فالليلة كنت بنده الف مرة 

بالف كلمة في الدقيقة

كنت بحاول اقولك اوعي تسمع

 لكلمة ابعد

او افلت ايدي

كنت محتجالك

محتاجة لنظرة منك تطمني

كان نفسي انك تطمني... 

مشوفتش غير القسوة في عيونك

مشوفتش غير نظرة تقليل لقيمتي عندك

كان لازم اني اعاندك

واكسر غرورك 

واكسر كمان عندك

واثبت لنفسي قبل منك 

إن الحب مش نقطة ضعف

وإن مكنتش ابقى اقوى بحبي ليك

وحبك ليا ميلزمنيش مدام مقونيش

وان كان حبي ليك كسرني

فحبي لنفسي قواني

وبقولهالك تاني 

انا من بعدك مش بعاني 

وبعدك والله قواني

إسراء الزهدي |غاسق