نحو وحدة تتجاوز القبلية

اسكريبت امرضني الحب

شهد الشيخ 

 نور:انت فين يا بنى 

احمد: انا خلاص داخل ع الكافيه

نور: ماشى سلام

احمد: سلام

قفلت معاه لقيته داخل الكافيه شاورتله وجه قعد قدامى

احمد: خير عاوزانى فى ايه.. ايه الموضوع اللى مش هينفع فى التليفون 

نور:عايزة افهم فى ايه

احمد:فى ايه وضحى قصدك

نور بنبرة حزينه:مع انك فاهم قصدى بس هقولك.. اتنهدت وقولت:عايزة افهم ليه بقيت بعيد عنى كده ليه مش بتكلمنى زى الاول ولما بكلمك بتقصر معايا فى الكلام هو انا زعلتك فى حاجه 

احمد: انا مخنوق شويه وعندى مشاكل فى الشغل بس

نور:طيب ليه مجتش تتكلم معايا ليه مجتش حكتلى اللى مدايقك زى مانا بعمل معاك

احمد: نور اقفلى لو سمحت على الموضوع ده وهى فتره وهتعدى

نور:لا مش هقفل انا لازم اكون معاك فى الفتره دى لحد ما تعدى

احمد بعصبيه خفيفه: نور قولتلك اقفلى الموضوع مش عايز اتكلم فيه

بصتله وسكت وانا مصدومه من رد فعله اول مرة يتعصب عليا من ساعه لما اتخطبنا

بعد أسبوعين

كان عندى زيارة وفضل قاعد ساكت من ساعه ما دخل من باب الشقه

نور:ساكت ليه يا احمد 

احمد: اتكلم اقول ايه

نور: اى حاجه

احمد: انا همشى يا نور عايزة حاجة 

نور: انت بتهزر يعنى من ساعه ما جيت وانت ساكت واول ما اتكلمت تقولى انا ماشى

احمد: عايزة حاجة قبل ما امشى

نور: لا مع السلامه

هو مشى وانا قومت دخلت اوضتى وفضلت اعيط بقاله فتره متغير معايا مش عارفه ماله ولما اتكلمت معاه قالى مشاكل فى الشغل والضغط بس مكنش راضى يتكلم اكتر من كده

عدى شهر بعد اليوم ده وجه يوم واتخانقنا خناقه كبيرة علينا صوتنا على بعض واحنا فى وسط الخناقة قفل فى وشى فضلت دقيقه استوعب اللى عمله ورنيت عليه تاني بس مردش رنيت تانى مردش رنيت تانى لقيته قفل التليفون فضلت اعيط اوى على اللى هو بيعمله معايا ومكنتش فاهمه ليه بيعمل كده وفى ايه وعيطت جامد اليوم ده ومن كتر العياط نمت على نفسى قومت تانى يوم دماغى تقيله وبتوجعنى بس اول حاجه عملتها مسكت التليفون فكرت انه بعتلى مسدچ او رن عليا لما هدى اصله مكنش بيسيبنى انام زعلانه بس... ده مبعتش ولا رن ده عدى الخناقه عادى ومرنش يصالحنى بعدها!!

قررت مكلمهوش اليوم ده عشان اتخنقت اوى من اللى حصل وقولت بالمرة اشوف هيعدى اليوم زى ما عمل امبارح ولا هيكلمنى.. بس ده عدى يوم واتنين وتلاته وهو مكلمنيش كنت هموت واطمن عليه بس كنت باجى على نفسى عشان لقتنى مش فارقه معاه بس مقدرتش دخلت بعتله مسدچ قولتله "ازاى هونت عليك تقعد كل ده من غير ما تكلمنى او تطمن عليا حتى!؟" كان هو قافل بعتها وقفلت التليفون وفضلت باصه فى اللاشئ وبفكر فى السبب اللي خلانا وصلنا لهنا عماله ادور على السبب اللي خلانى هونت عليه فضلت افتكر كل حاجه بينا حصلت ملقتش سبب لتغير ده.... انا فعلا لقيته فى يوم متغير فضلت اسأله قال مفيش ومكنش عايز يتكلم معايا قفلت معاه وقولت يمكن انا غلطانه وهو فعلا مفيهوش حاجه تانى يوم لقيته مبعتش مع انه كان اون لاين بعتله رد على قد الكلام وسكت محاولش يتكلم معايا وانا فضلت افتح فى مواضيع وهو زى ما يكون بيقفلها فضلنا اسبوع على الحال ده لحد اليوم اللي قابلته فيه فى الكافيه ومن بعدها بقى بدأت بينا المشاكل بسبب انه مش مهتم بيا ومتغير معايا بس كانت بتخلص بكلمتين منه"حقك عليا" بس كانت اخر خناقه دى كانت مختلفه وكانت اول مرة يسيبنى انام زعلانه واهون عليه كده... فوقت من تفكيرى على صوت رنت التليفون بوصول مسدچ مسكت التليفون لقيتها منه فتحت لقيته باعت بيقول"معلش بس انا مشغول الايام دى"

مكنتش متوقعه الرد ده خالص فضلت باصه للمسدچ وانا بقول فى نفسى يعنى ايه مشغول ومشغول فى ايه ومشغول لدرجه انه مش هيعرف يكلمنى خمس دقايق يطمن عليا فيهم لا مش لدرجه دى مهو بعتلى اهو.. بعتله قولتله كل الكلام ده بعتلى وقالى"انا مش ناقص وجع دماغ يا نور وخناق وسلام بقى عشان مشغول"

شوفت المسدچ دى ودموعى نازله من عينى... احمد عمره ما عاملنى كده ومكنتش بهون عليه خالص ولو انا غلطانه كان برضو بيجى يصالحنى وفى عز انشغاله كان بيكلمنى يطمن عليا ولما كنا بنتكلم كان بيفضل يتكلم كتير اوى ولما اقوله انى هقفل عشان الوقت اتأخر يقولى لا استنى خليكى شويه كمان كان مش بيحبنى اقفل وبيحب وقته معايا هو كان دايما بيقولى كده... لكن دلوقتي مش عارفه ايه اللى حصله مش عارفه هو ليه بقى كده!!........ قعدت يوم واتنين ومكلمنيش فقولت اكلمه انا اصله وحشنى دخلت كلمته "عامل ايه" رد قالى "تمام" حتى مسالنيش انا عامله ايه حتى لو تقضيت واجب بعتله قولتله"انت مكلمتنيش ليه اليومين اللي فاتوا قالى"قولتلك انى مشغول وعندى ضغط مشاكل وشغل"

"اى هى المشاكل دى ومشغول فى ايه لدرجه انك متكلمنيش" قالى"مفيش يا نور شويه مشاكل وخلاص وقولتلك قبل كده مش عايز اتكلم فى الموضوع ده "

قولتله"تمام يا احمد "شافها ومردش بعدها عدت علينا فترة وحشه اوى كلها خناق وايام كنا مش بنتكلم وانا كنت تعبت من كل ده فكنت مش بدخل اكلمه لانى مش كل مرة هاجى على نفسى واكلمه وانا اللى زعلانه! كانت علاقتنا متوترة فى الفتره دى لحد ما جه يوم وقولتله انى عايزة اقابله... اتقابلنا فى نفس الكافيه 

نور: احمد انا تعبت من كميه المشاكل اللي بينا 

احمد: وانا كمان تعبت اكتر منك المفروض تراعى انى مخنوق وتعبان لكن لا لازم كل يوم خناقه 

نور: على اساس انى بتخانق معاك من غير سبب مهى افعالك هى اللى بتخلينا نتخانق انت بقيت مهمل فيا وبقيت متغير معايا بشكل غريب مش انت احمد اللى انا اعرفه

احمد:قولتلك انى مخنوق وعندى ضغط ومشاكل ومشغول 

نور:لدرجه انك مش عارف تفضى خمس دقايق تكلمنى فيهم؟ تسبنى بالايام من غير ما تعرف عنى حاجه وكمان مش عايز تشاركنى مشاكلك

احمد: واشاركك مشاكلى ليه؟ هتعملى اى يعني؟ 

نور: يمكن اعرف الاقى حل ولو معرفتش، اكون جنبك 

احمد: لا متشكر مش عايزك جنبى انا مش صغير انا كبير واعرف احل مشاكلى

نور بعصبيه: مانت بقالك قد ايه ومش عارف لسه تحل حاجه بالعكس دى بتزيد بزيادة مشاكلنا انا وانت

احمد بعصبيه: نور وطى صوتك وعلى الله يترفع تانى

سكت وفضلت ابصله وهو كمان فضل يبصلى وفى ثانيه كنت قلعت الدبله من ايدى وحطتها على التربيزة فى النص وهو بصلها وبصلى وكأنه مستنى انى اتكلم فاتكلمت وقولت

نور بحزن:حاولت انى موصلش لهنا بس انا تعبت ومش هقدر اكمل 

احمد: اللى يريحك يا نور

وخد الدبله وقام مشى

وانا قاعده مكانى وانا مصدومه رغم كل المشاكل وطريقته اللى اتغيرت معايا إلا انى مكنتش اتوقع انه هيعمل كده انا فعلا تعبت ومش قادره اكمل بس لو كان قالى اى كلام يحسسنى انه لسه باقى عليا ومتمسك بيا انا ك... كنت مش هسيبه. 

قومت مشيت روحت وطول الطريق بعيط دخلت لقيت ماما فى المطبخ وبابا كان فى الشغل فدخلت اوضتى على طول فضلت اعيط جامد وانا مش مصدقه ان دى كانت نهايتنا احنا مكناش مخطوبين عن حب لا كان صالونات بس والله حبيته... وكأنه حب سنين قبل الخطوبه وهو كمان حبنى او زى ما هو كان بيقولى وشوفت اسعد ايام حياتى معاه وبرضو شوفت اوحش ايام معاه وتعب نفسى وضغط بسببه وبسبب تغيره اللى ملوش سبب ده من بعد اليوم ده وانا حالتي اتدهورت اوى ومكنتش باكل وتعبت ودخلت المستشفى ولما خرجت منها وصلنى خبر مكنتش اتوقعه وصلنى انه" مات" انهرت ودخلت فى حاله اكتئاب حادة ومكنتش بتكلم مع حد خالص ودايما قاعده فى اوضتى بعيط....اصله وحشنى.. وحشنى صوته ووحشتنى ضحكته وحشتنى ريحته وحشتنى ايامنا لما كنا بنسهر سوا وبيفضل يغنيلى ولما كنت بزعل يجى لحد البيت يقف تحت البلكونه ويجبلى ورد وحاجات حلوة كتير عشان اصالحه واضحك وحشنى احمد بكل تفاصيله

وبعد موته بشهرين فى يوم جت اخته ودخلت اوضتى واول مانا شوفتها جريت عليها حضنتها وفضلت اعيط وهى عيطت وفضلت تطبطب عليا 

امل:اهدى يا نور انتى عارفه ان احمد الله يرحمه مكنش بيحبك تعيطى

نور:مش قادرة يا امل مش قادرة اصدق انه مبقاش موجود 

امل:الله يرحمه كلنا رايحين... ادعيله يا نور 

نور بعياط: وحشنى اوى

امل: وحشنا كلنا البيت بقى كئيب من غيره مدخلش الفرح فيه من بعده

وبعد كلام كتير بينا عرفت منها ان احمد مات بمرض السرطان انا مكنتش اعرف انه كان تعبان قبل موته عرفت ده لما مات بس مكنتش اعرف هو كان عنده اى! كان تعبان وفى حاله متأخرة والعلاج مكنش هيعمل معاه حاجه عشان كده كان دايما بيتهرب منى ومش بيكلمنى كان عايزنى اكرهه عشان لما يموت متأثرش وازعل لانه خاف عليا من الوجع والزعل... بس هو غلط اوى لما عمل كده هو وجعنى لما كان بيعاملنى كده ورغم كل اللى حصل انا مت بموته روحي سابت جسمى لما هو مات قلبى اتكسر واتوجع 3 مرات مرة لما كان متغير معايا ومرة لما سبنا بعض ومرة لما مات قلبى عرف الحب معاه ومات معاه 

        _______________________

نور:تعرف يا دكتور انى كان عندى امل انه هيجى يصالحنى ويلبسنى الدبله تانى ويقولى جملته"انا مليش غيرك يا نور عينى ومستحيل اسيبك" بس هو سابنى خالص

ومن هنا نور بدأت تزيد فى العياط وصوت شهقاتها بقى عالى طبطبت عليها وفضلت اهدى فيها لحد ما هديت شويه واديتها تشرب

يوسف: احسن؟ 

نور هزت راسها بالايجاب

نور: انا مش عارفه انام من يوم ما سبنا بعض مش عارفه اتحرك وقفت لحد عنده....انا ندمانه انى سبته كان لازم مسبهوش واعرف ماله كنت المفروض اكون جنبه ندمانه ع كل الخناقات اللى كانت بينا هو كان تعبان وانا زودت ده عليه... احمد كان كل حاجه فى حياتى... وحشنى اوى وحشنى بكل تفاصيله عقلى وقلبى لسه رافضين انه مبقاش موجود خلاص... انا حاسه انه هيجى فى يوم ويكلمنى ويقولى وحشتيني...هو امتى هيجى اليوم ده عشان كل ده يخلص...انا مش قادرة اعيش من بعده...اا..انا

قاطعتها وقولت:اهدى خلاص كفايه كلام

فعلا سكتت وبصت فى الارض وهى شاردة

يوسف:انا كتبتلك علاج هيساعدك ع النوم ومهدئ عشان اعصابك وان شاء الله اشوفك الجلسه الجايه 

خدت الرشته ومشيت وهى عيونها مليانه دموع وكانت باصه فى الارض خرجت وقفلت الباب وراها وانا فضلت باصص لطيفها.

الحب الحقيقي هو اللى مش بيموت او بيروح مع الزمن.. وياريت لو حد بنحبه تعبان نفضل جنبه مش نسيبه نفضل معاه لحد ما يعدى محنته دى ونعرف فيه ايه مش نسكت بمجرد ما هو يسكت لا نطلع منه الكلام بالعافيه ونشبع من حبايبنا ونفضل معاهم اطول وقت ممكن ونعيش معاهم اجمل ايامنا لان الموت بيجى فجأة.

شهد الشيخ|جاردينيا